Friday, January 20, 2006

MŨNDŨ WITŨ NĨTWĨYŨMĨRĨRIE

Muthoomi muugi, ta reke nguhe ndeto ino tondu-ri, Muugi ni muutaare.



Tũkĩhaica ndege twathiaga Ruraya, nĩtwagĩkinyire.
Nĩtwerĩtwo nĩ kũritũ, no ti ta ũrĩa twagĩkorire
Mũtũheei ũhoro aakoragwo athimĩte
Ndaarĩkagia rethi, ta kaburaita kena ihuti,
Wee ũũka wĩyonere kuo ti kũũru.

Nĩtwagĩũkire na tukĩĩyonera
Iyo nĩ heho ikũũnjaga mũndũ ta ngũkũ njurĩre
Iyo nĩ mbarabu ĩitĩkaga gũkahaana burugĩ
Acio nĩ andũ mũhĩtũkanaga na mũtitumũkane
Wa mwene nĩ ũmwe, kĩu kĩngĩ nĩ kĩrĩndĩ.

Twatuĩkire ngombo cia mathaa
Gũkĩa, gũtuka, gũkoma, wĩra, irĩhi no mathaa
Urore ya riũa kana ya guoko, ngũkũ igambe kana ikire
Riumagarĩro ihũndũkĩro no thaa, mathaa, mathaa
Toro nĩ wa mbũkũ, ũhingĩte riitho rĩmwe mathaa matikore.

Andu mekĩriirwo iterenge, magwatio matikae kũũra
No amwe nĩ cekeri mategete ti acithũkũmi
Kaari o nyũmba ya Mũmbi theri yũũrĩte
Athũngũ na ũhĩndĩ mũregete kũmatega nĩkĩ?
Kana kwao gũtirĩ thabatũ? Mahuunjĩrio na mahothe.

Matirũka nĩ maingĩ kwĩ magũa
Kũgwa na ndũũkĩre nĩ gwa kĩrimũ
Njaamba nĩ gwĩthaga ĩhũũrane na ũkĩa
Nyama ndĩrĩyagwo nĩ wĩra
Mũndũ witũ nĩtwĩyũmĩrĩrie twaga gũkua tũgataha.

Gwitũ ti gũũkũ, gwitũ nĩ kũraihu
Ndokire gwetha ndiokire gũitanga
Nyoni ĩmeragia na ĩgatahĩkĩra tũcui
Wona mawega wĩhũgũrĩre acio angĩ
Wakinĩ kunda tũkundanĩre, gwitũ nĩ kũraihu.

Ng'ang'a wa Wairia

2 Comments:

At Tue Jan 24, 03:19:00 AM EST, Anonymous anthonymuchiri said...

Hi Uncle Charles,

Just Bumped into your site and Wow! you are doing a GREAT JOB promoting what is our Origin, Gikuyu na Mumbi.

Keep UP the Good Work.

My Email anthony.njoroge@barclays.com or anthonymuchiri@yahoo.com.

Happy New year...sorry. Giai na mwaka mweru wina irathimo Ny'ingi.

Muchiri.

 
At Wed Nov 14, 12:29:00 AM EST, Anonymous Kamau said...

Nindakena muno mundu wa nyumba ikinya
niriu ini ti giakuu.
Niwega muno.
Thaii.
Niturungamie Kigongona.
Thaii.

 

Post a Comment

<< Home