Monday, January 02, 2006

MWAKA MWERU
Murata wakwa, riu ni mwaka mweru gitari ini kia miaka, no kai no muthenya ungi wakiai. Ungiikia maitho wona ta gutari na ugaruruku thi, no ungiikia maitho ma ngoro wona nigucinjitie.

Matuku maitu ni mathiraga o muthenya ikereka ria ruhia. Ugicooka kubaara ruhia niruguire, watigwo wi munu. Riu hihi hindi iyo ugeeka atia? Ciatua guikania wee no kwiheta tondu nduri na rwa kwigitira naruo ona kana rwa guikia iyo ingi. Gia na gitugi kiria ukenyitirira na kamugaa karia ukeyuwa riua.

Riu mwaka mweru nitugie na itua rieru. Tutigane na ndeto cia gwithahia na gwithukia. Tuoye maundu meeru magutukuria na gutuikaria na ugima wa meciria na mwiri. Turongooranirie nyoni njega na tweheranirie matuhuhu. Twambararie maitho tuone mawega na ndathimi cia Mwene Nyaga. Tugitungage o minyaka riumagariro ona ihundukiro. Aria me turathimaga uguo-ri, ona ithui tumarathimage oguo.

Indi mbari ya muura huuho, na mbari ya kanyua ikame, acio tumageke tuuge marora. Magithii kugera ngero na kwananga-ri, maromaka na matungwo ni matuhuhu. Marwethiririma mutino ta maguta na macuhiririwo ni thina ta kieha. Riria maikaire thi magicuurania mawaganu mao-ri, maroaga kuiguithania miario na magaruruke meyeherie ndundu-ini iyo ya eeki naai.

Tukiuge atia na mwaka ni mweru, nitucarie mianga mieru. Tumiunure, tuhihie, turute karuruma, tumotore, turianire. Mwanga ungikura muno niugumaga na wahota kuhuhitia murii. Nitugitigane na mianga iyo ya tene tucarie mianga mieru. Twaruke hianyu mweru, tuciimbe ngamba-ini, na tondu ng'undu iri gutahwo ciothe-ri, nitukihoranie ici itigarite maratathi-ini turore kana hihi notuone gia kuria.

Riu mwaka mweru, mwanga mweru na itua rieru. Ngugikinyukia oro uguo-i, tondu cia athuri inyuagira thutha. Na tondu ithekagirwo muumo, ndina mayu onanii tondu wanaruona anarumenya. Ndikuinira ihugo nii ndiri kironda na njong'i ndiagite ingikunya. Nikio ninjukike thoithite nao me thutha makiinaga atiri:
Kinya! Kinyukia! Kinyaga oro uguo-i! Ugithii no Ugiicooka!

Kenera mwaka mweru!!!!

4 Comments:

At Tue Jan 17, 10:52:00 AM EST, Blogger Gatua wa Mbũgwa said...

Kũrĩ Wairia,
Kũngũ nĩ kwambĩrĩria wĩra ũyũ mwega wa gũkũria rũthiomi rwitũ. Nĩ ndakwamũkĩra na gĩkeno na ndũhio. Thiĩ na mbere na kũhe andũ ũhoro nĩ amu gũtirĩ witũ ũkoima na njĩra ooke atũkũrĩrie rũthiomi kana atũkũrie.

Nĩ gĩa kũu gĩtikwenda thogithi. Nĩ kĩrekwo gĩcaye!

Thaaai!

Gatua

 
At Wed Jan 18, 09:13:00 PM EST, Blogger Ndesanjo Macha said...

Hongea sana kwa uamuzi wako wa kuwa na mburogu yako ya Gikuyu kama Gatua. Ingawa sielewi kila kitu mnachoandika, ninawaungeni mkono kwa kuamua kutumia mburogu kuendeleza utamaduni wetu.
Thaai!

 
At Fri Jan 20, 02:01:00 PM EST, Blogger Ndegwa Ndûi said...

Nîma mwaka nî mwerû ûyû. Mûndû akinye aikîtie mbugi manjarara. Ndira itoge na mîthirimo yûme,
Ngwa ciûke kana citiûke.
Mbura yure kana ndiure.
Mûndû arumie rûhiû rwa njora tondû gutirî wanyu ûkoima na njîra kûrûa mbara yaku.

 
At Sun Feb 26, 10:01:00 PM EST, Blogger Irena said...

Ndi mucerere no ninjui ni uragia na mwaka mweru...

 

Post a Comment

<< Home