Thursday, January 17, 2008

BŨRŨRI ŨRĨ KŨINAINA

Nĩkĩĩ bũrũri wainaina ũguo?
Nditikũ na magumĩ mĩena yothe.
Tondũ hiũ irĩ kuma njora-rĩ
Nĩta kuma rĩ andũ matuĩkire macehwo ta macoya
Kana matũgũtwo ta rũthirũ?

Andũ matũire marĩaga hamwe na makanyua hamwe
Kĩroko kĩmwe matuĩka thũ mokanĩrĩra
Andũ matuĩka nyamũ manine ciana na atumia
Mwana nĩoĩ rũgũrũ kana itherero?
Nawaita thakame o agĩgũkayagĩra!

Kĩigue ngũhe ndeto, tega matũ uĩgue
Mbarĩ ya iregi no matuire
Arĩa mathire ũturi no macoke, ĩĩ nĩmacokete,
Mwana wa Mũmbi ndangĩũrĩra ta wa thwariga
Ahurĩtio nĩ hiti kĩrĩti, aca ũyũ arĩ ruo.

Kwenda bũrũri na thayũ waguo ti guoya
Kũrũmia watho na matua ma cira wa kĩhoto ti guoya
Kwaranĩria na arĩa metuĩte thu cia bũrũri ti guoya
No rĩrĩ, mũrega akĩĩrwo ndaregaga akĩhetwo
Na kĩhooto kĩongagĩrĩrwo njũgũma
Amu mũingatwo na kĩhooto ndacokaga

Rĩu tondũ ndagũtambũrũkĩria njara ngũgeithie
Nawe wanengera njara ũkũnjĩte ngundi-rĩ!
Nĩniĩ ngũkũnja ngundi kana nĩwe ũgũkumbacũra tũgeithanie?
Kaĩ ĩkũrũndwo ĩregaga rũoro
Kana no thari ũraikia ta bunda ngũthe nĩ mbathi.

Rĩu ona tũtegũkĩrora arĩa manathiĩ itĩri-rĩ
Kaĩ wa kĩrimũ ũtetirimagia na mũgĩ
Ĩno thirikari ti ya gũikio ndahi nĩ o ũrĩa woka
Ĩno nĩ ngitire nĩ njama ya endi bũrũri
Biringi ĩngĩhuhwo twathikũria njirũngi na gotora
Kũrĩa twathikire njora na matimũ irĩ oho..

Nĩ thayũ twendete, ti guoya tũrĩ.
Bũrũri nĩ witũ, kuma Ndemi na Mathathi
Tũtikoima kuo, na kũrĩa guothe mũgĩkũyũ
Aakĩnyithirie makinya, kũrĩa guothe thigira wake ũthikĩtwo
Tĩri ũcio nĩ wake. Na yuraga ĩkĩyaga ndakoima kuo.
Mũthungũ atũite thakame, mũrũgũrũ atũite thakame
Nĩtwarega! Na ũmenye nĩguo-rĩ, twakĩrega!

5 Comments:

At Tue Jan 22, 03:35:00 PM EST, Anonymous Kung'u said...

Mundu wa nyumba nidetikira! Mugikuyu ahendaga ta mugumo, na nyumba yakagwo na miti iria mundu atuite, tiga tu... njamba ti ikere nayo iguithagio ni mucakwe!

Thayu wa Mwene Nyaga!

 
At Wed Jan 23, 01:34:00 AM EST, Blogger Phillip said...

ona nii nguuga o tawe
nitwarega biu biu

 
At Wed Jan 23, 09:42:00 PM EST, Anonymous Anonymous said...

nitwarega!nitwarega!nitwarega!
guciinirwo ciina ciitu!kanithaini
guciinirwo atumia aitu!kanithaini
guciinirwo ciikaro ciitu
guciinirwo itindo ciitu
ikai-twikagwo atia tukarua?
nitwarega

 
At Fri Jan 25, 04:24:00 AM EST, Anonymous Kamau said...

One Hindi moiga ciume njora!
Ati magacina ciana na atimia aitu kanithaini.
Oma Oma Njehova Ngai witu Owe Mwene Nyaga Aromanina na mwaki.
Gikuyu nyumba itu Thaii Thathaiya Ngai Thaii.
Mwene Nyaga Ngai Wa Gikuyu Aroikara na ithui.
Kirinyaga Thaai.

 
At Sat Jan 09, 09:04:00 PM EST, Anonymous Anonymous said...

Your blog keeps getting better and better! Your older articles are not as good as newer ones you have a lot more creativity and originality now keep it up!

 

Post a Comment

<< Home