Thursday, August 26, 2010

KŨNGŨ BŨRŨRI WOTHE!

Bũrũri wothe no kũngũ tondũ rĩrĩ kũratha
Tũrĩ gũciarĩrwo gakenge kangĩ
Twaciarĩrĩrwo ka wĩyathi
Karĩa gokire na ndege kuma Rũraya
Rĩrĩ ti rĩa riiko
Gaka nĩ gaitũ gwĩcarĩria

Nĩtũkĩrũhiei tũkoigĩre, ti ithano na ti ithatũ
Ici nĩ kenda mũiyũru, ona ciune
Gaka ti ka nyũmba kana thingira,
Gaka nĩ ka ng’ũndũ, ng’ongo, ituamba na werũ
Kuma Ngong’u kinya Ngarĩbatura
Mambatha nginya Gĩthumo
Cumarĩ nginya Nyang’ori
Werũ wa Turũkana na wa ũkabi, guothe kũngũ
Tũcũgie gakenge

Mwana arĩ kuma nda, ndarĩ na kaũgũ, ĩĩ nĩ mũgima
Njogu ĩrĩ gũtinio, nayagĩthikwo
Mwana nĩatumberio, nĩamenyerio nginyo cia mbarĩ
ũmathi na ũrĩithi, hukũro na mambura
Kana kogĩ ta ithe
Gaka nĩ gaitũ ti karĩa kene tweragwo wako

Kũngũ bũrũri wothe
Ndũrĩrĩ nĩ irũhie, ĩĩ nĩ ikenererũke
Rĩu tũtikuona ta kwĩna mairia
Tũrona gũtherete, maitho matirĩ njereri
Nguona ituamba ciĩ ngogoyo
ũũkĩ na ngurunyũ, rũkũri na kamitũ
Nĩtũrĩyanĩrei ta ciana ciendaine cia nyina ũmwe
Maitũ witũ Kenya.

ĩĩ nĩtũrũhie, kenai o gũkena na thutha wa mĩtheko
Gũtikagĩe ndihanio, ndindĩkano na ndathano
Ũkĩhuria na mwĩhĩrĩto waku
Ũkĩrai tũkenere gakenge gaitũ
Mũnyaka ũrĩ mbere ya kahinga
Wĩra nĩ kũrera gũciara nĩ kwa ihinda
Kũrera nĩ kwa mĩaka yothe ya rungu rwa riũa
Kenai na mũkenererũko, Ruciũ ti rwaku
No bũrũri nĩ waku, kĩ ũtungate
Kũngũ bũrũri witũ, gaka nĩgaitũ kwĩyethera.

Monday, August 09, 2010

KŨNGŨ BŨRŨRI WOTHE!! ĨĨĨĨ NĨTWETĨKĨRA GATIBA MŨHIANO!!!!

Mũthomi mũgĩ mũrata wakwa,
Andũ aitũ cira ũrĩ gũtuithanio na kĩhooto kĩarũgama. Wendi wa arĩa aingĩ woiga Gatiba Mũhiano nĩyetĩkĩrĩka. Yũkiai kũngũ inyuĩ mũingĩ wa Kenya. Inyuĩ endĩ thayũ, kĩhooto na ũma. Yũkiai kũngũ nĩ kũiga thayũ na kũrũgamĩrĩra ma yanyu hatarĩ ndihanio. Handũ hekũgĩa gĩcindano no ngiya hagĩe mũhotani na mũhotwo. Ĩrĩ kũrũndwo ndĩregaga ruoro. Wee ũrarũndirwo ũkĩra wĩhure rũkũngũ tũtwarane. Ndũgaikare o hau ũrarũndĩirwo, ũka tũtwarane mũrata wakwa tondũ nĩtũgũkora mangĩ maritũ mbere na mekwenda tũkorwo twĩ ndundu.
Rekei tũtumberie kaana gaka na kinyi. Tũgakundie iria na tũgatanukĩre marigũ kagĩe na hinya. Ndamũthaitha o mũndũ o mũndũ nĩ agĩe na gatiba ĩno na amĩthome wega. Waga kũmĩmenya wega, ndũkamenya ũgĩtunywo haki yaku. Rĩrĩ nĩ ihinda rĩa kũrehe ũgarũrũku maũndũ-inĩ maitũ na mĩtũrĩre-inĩ iitũ. Mũingĩ rĩu nĩguo wĩna hinya wa gũtwarithia maũndũ ma bũrũri na mbere no ndũngĩka ũguo ũngĩkorwo ũtoĩ gatiba ĩroiga atĩa. Twarekereria ateti matuĩke nĩo atabuti a gatiba, nĩtwetunya hinya witũ na twanenengera hiti rũru. Ithuĩ nĩ ithuĩ twĩna hinya wa kũmera ũrĩa tũrenda kũringana na gatiba no tio. Nĩtũkĩĩhotore tuoe koiga gaka, Gĩkũyũ oigire koiga gatune nĩ mwamũkanĩro, oya hakũ naniĩ hakwa tũkũrie bũrũri witũ, tondũ kamũingĩ koyaga ndĩrĩ.
Mwaki ũrĩa ũrakirio ndũkahore, rekei tuongerere ngũ nĩgetha wakane makĩria na marĩa mabataire gwĩkwo nĩguo ndeto ĩrĩkĩrĩre mekwo na ihenya, mekwo na kĩhoto, na mekwo ũtheri-inĩ. Gũtirĩ mũndũ rĩu wĩna kĩhoto gĩa kũhatĩrĩria mũndũ ũrĩa ũngĩ, kana kũhahama maũndũ ma mũingĩ tarĩ make, kana kũmbĩria indo cia mũingĩ tarĩ ciake, kana kũhotomia kĩhoto kĩa ũmũndũ.
Rekei gakenge gaka gakĩhumbwo nguo matukũ ikũmi mokĩte tũkorwo nĩtũhumbĩte meciria maitũ, na thamiti ciitũ, maũndũ merũ. Thambiai itete nĩgetha itikamatie iria nĩ gũtukania rĩa iyo na rĩa ũmũthĩ.
Ngai njega na kũngũ nyingĩ nĩ kũrũgamĩrĩra ma yaku.