Mũthomi Mũgĩ Mũrata wakwa,
Amũkĩra ngatho ciakwa nyingĩ cia gĩcĩcĩng’a nĩ ũrĩa ũkoretwo naniĩ rũrenda-inĩ rũrũ mwaka ũyũ ũrorete kũbuĩria ona mĩaka ĩrĩa ĩngĩ mĩhĩtũku.
Rĩu tũkiugĩra mwaka ũyũ ũhoro, nĩndakũrongoreria mũnyaka mwega na mwago mwaka-inĩ ũyũ tũrorete. Ngakũhoera ũtũnganage na nyoni njega, mwere waku ũingĩhe, kĩmera kĩagĩre, ũhiũ waku ũthereme, ũroaga kũhuna, ũhũne mũnyũ, ng’ombe ciaku irociaraga mori, nacio mburi ciaku iciarage harika, tũgondu twaku tũrotũhaga nĩ hũni nayo mĩatĩ yaku ĩgũciarĩre ngoima itarĩ kĩmeni.
Ciana ciaku irokũigua na thingira waku ndũkanahore mwaki, ũrorokagĩrwo nĩ karĩa gatarĩ thahu, ndũrĩrĩ irokũganaga nĩ ũtana, nawe ũrotanahĩra arĩa mwĩtainwo ona agendi na ũtana mũkĩru. Maundũ-inĩ mothe ma mwaka ũyũ tũraingĩra marotuĩka ma gũgũikaragia na gĩkeno, gĩtĩyo, kĩrathimo ona thayũ.
Rĩu-rĩ , kĩgĩe na mwaka mwerũ mwega na tũcemanagie kaingĩ haha kĩharo-inĩ gĩkĩ tũnorane na tũũhĩganie.
Ngai njega.
posted by Charuthi Ng'ang'a Wairia @ 5:53 PM
3 comments
3 Comments:
Urorathimuo mundu witu ni ciugo ciaku njega
Niĩ nĩ ndetĩkĩra kuna iru twaranĩrie. Nĩ ndũraga njethaga andũ mena meciria ma gũkũria rũthiomi ruitũ rwa gĩgĩkũyũ. Nĩ ngenire mũno nĩkuona na kũmenya rũrenda rũrũ rwaku. Mwaka ũcio ũrathirire nĩ ndĩrecirĩtie nyambĩrĩrie rũrenda o ta rũrũ. Ngĩetha kana nĩ kũrĩ rũrenda tarũu, ngiona “Maitũ nĩ Ma Itũ’. Ũmũthĩ ngĩthoma rũrenda rũu rwa “Maitũ nĩ Ma Itũ’, ndona rwaku na ndakena mũno.
Mĩaka ĩtandatũ mĩthiru nĩ ndanjĩrĩirie gũtaũra ng’ano cia marimũ na ndĩ na ibuku rĩmwe icabe. Rũthiomi rũtekwario nĩ ciana rũraga narua, na nĩ ngayagĩra aciari marute ciana rũthiomi rwitũ. Kaingĩ na kaingi ngaigua ta hianire Yohana Mũbatithania ee weru-inĩ!
Thiĩ na mbere na wĩra mwega. Nĩ ndĩthomaga rũrenda rwaku kaingĩ na kaingĩ. No nyende mũno tũrutithanie wĩra ũyũ. Ũkuona atĩa? Hinya wakwa nĩ ũrutani wa ciana nyinyi (nĩ guo na kĩng’enũ Early Childhood Education). Ngũtigĩra hau.
Nĩ niĩ mwarimũ ngiuga, ciana ithome gĩkũyũ!
Nĩndarũhia nĩkuona wathiritũ wĩna kinyi gũkũria na gũtũũria rũthiomi rwitũ. Nĩtũtwarane, tũtaarane, na tũũmanĩrĩrie tondũ gũtirĩ witũ ũkoima na njĩra oke akũrie na atũũrie rũthiomi rwitũ o tiga ithuĩ ene. Nĩtũkwaranĩria. Iyũkia ngatho nyingĩ.
Post a Comment
<< Home